O pasado sábado apareceu un interesante artigo en Xornal de Galicia sobre as medrantes relacións entre a poesía e os novos creadores musicais. Cítase nese sentido o inminente compilatorio Once máis 15 que recolle o noso tema "Ningún lugar seguro (GalegoZ remix)", adaptación dun poema de Antón Lopo. Amais o derradeiro parágrafo deixa caer unha afirmación que pode semellar delirante mais que, ben, anotamos con gratitude na pequena e estraña tulla da nosa autoestima.
Porque si, é certo que nunca nos imos ter en moito. Mais iso non impide que nos sintamos aldraxadas cada vez que escoitamos esa infame versión (ou plaxio, non sabemos moi ben cal é a palabra) de Paul á sombra, que xa están a competir no A Polo Ghit a pesar do desgusto que AE fixemos público.
A consigna que transmitimos desde aquí a aquelas e aqueles que nos queirades apoiar é un tanto sorprendente, mais cremos que efectiva como castigo exemplar: votade por eles, que vexan ao alcance das mans corrompidas ese seu soño de grandeza... a caída e o impacto, sonoro, doloroso, corren por conta nosa...
Mais rematemos coas cousas verdadeiramente importantes: este domingo 5 tocamos no noso benquerido C.S. Aturuxo de Boiro, vémonos aló.
